Joshua mi-KO ni Klitschko

CEBU, Philippines – Si Anthony Joshua impresibong mibangon human matumba sa ikaunom nga hugna aron patikangkangon si Wladimir Klitschko sa ika-11 nga hugna sa eksplosibo nilang binukbukay nga nakalingaw og maayo sa kapin sa 90,000 ka fans nga nagdasok didto sa Wembley Arena sa London, England kagahapong adlawa.

Gawas nga nadepensaan ang iyang bakos isip IBF heavyweight champion sa ikatulong higayon, gilabni sab sa 27-anyos nga si Joshua ang WBA title.

Si Joshua mipatupa og makabungog nga right uppercut nga nakapahagba ni Klitschko sa ika-11 nga hugna. Bisan og mibarag pa gamay, miaksiyon og bangon si Klitchko apan nahagsa na sab kini ibabaw sa ring.

Sa dalaygon nga pagpakita og kasingkasing sa usa ka kampiyon, si Klitschko misuway pagbarog og usab apan si reperi David Fields mi-undang sa away sa dihang nakita niini nga si Klitschko dili na makadepensa pa sa lain na usab untang bangis nga opensiba nga ilusad ni Joshua.

Mao kadto ang labing unang pilde ni Klitschko pinaagi sa knockout sukad siya gipakatug ni Lamon Brewster 13 ka tuig na ang milabay. Sa kinatibuk-an, lima pa lamang ang iyang pilde sa 69 ka away, samtang si Joshua miinat sa way tatsa niyang record ngadto sa 19-0 pulos pinaagi sa knockout.

Nindot kaayo ang sangka sa duha ka higanteng boksidor nga gidayeg kini sa pipila ka mga boxing legends sama nilang Sugar Ray Leonard ug Lennox Lewis nga maoy katapusan nga nahimong undisputed world heavyweight champion.

"The best man won tonight and it's a massive event for boxing," matud pa ni Klitschko ngadto sa Sky Sports."Two gentleman fought each other. Anthony was better today. It's really sad I didn't make it tonight." –EBV (BANAT NEWS)