Top 9 most wanted sa Talisay nasikop
CEBU, Philippines - Gisugat og posas sa pantalan ang lalaking giila nga top 9 most wanted sa Dakbayan sa Talisay niadtong Lunes sa gabii. Ang nasikop mao si Winnvel Cabriana alyas Bonsay, 23-anyos, ulitawo nga taga Sitio San Miguel, Barangay Linao.
Si SPO2 Jeffrey Diola sa Talisay City Police Station nibutyag nga notadong tulisan si Cabriana. Gani sa iyang pagka-wanted, nisibat kini ug nitago sa laing lugar.
Apan sa impormasyon nga nadawat sa kapolisan, si Cabriana nisakay og barko pabalik dinhi sa Sugbo.
Wala maglangan ang mga operatiba, ilang gidala ang warrant of arrest niini nga giisyu ni RTC Branch 65 Judge Glenda Go tungod sa kasong pagpanulis.
Gisugat sa mga polis si Cabriana sa Pier 1 sa Siyudad sa Sugbo ug wala na kini makapalag sa mga otoridad. Asoy pa ni Diola nga idlas ang maong suspek apan naabtan gyud siya sa iyang demalas. (BANAT NEWS)
- Latest
