Prayoridad nga pasahero limitahan

CEBU, Philippines - Limitahan na sa tagdumala sa Cebu South Bus Terminal ang pagpasakay sa mga priority nga pasahero atol sa pagdagsa niini sa umaabot nga Kalag-kalag.

Matud ni Joey Herrera, pangulo sa CSBT, nga kini aron aduna pay mapasakay nga mga regular nga mga pasahero.

Si Herrera nagkanayon nga ang usa ka tiguwang, mabdos ug may kabilinggan sa panglawas, limitahan lang sa usa ka kauban ang makakuyog sa priority area ug ang uban kinahanglang molinya na sa mga regular nga pasahero.

Matud ni Herrera nga kung unahon ang tanang priority passengers, dili gihapon mominus ang linya sa mga regular nga pasahero.

Ang priority passengers nagpasabot nga dili na kini molinya ug adto na maghuwat sa priority area apan ipatuman gihapon ang “first come first serve” nga sistema sa pagpasakay sa bus.

Ang kadagkuan sa terminal nangandam na sa pagdagsa sa pasahero sunod semana diin gipwesto na daan ang 10 ka tulda sa holding area sa luyo sa terminal ug laing tulo ka tulda ang gipalit aron nga ibutang sa holding area sa atubangan.

Ang mga pasahero nga padulong sa Toledo, Balamban ug uban pa sa kasadpang bahin sa probinsiya adto kini sa Entrance 2 mosulod sa habig sa Land Transportation Office.

Ang padulong sa Argao, Carcar ug ubang bahin sa habagatan adto mosulod sa Entrance 1 sa habig sa E-Mall.

Sugod sunod Sabado, wala nay pasudlon nga taxi ug pribadong sakyanan sa terminal aron dili magsamok ang sulod tungod sa ka daghang pasahero. (BANAT NEWS)