Dobleng demalas

CEBU, Philippines - Dobleng demalas ang mihampak sa Golden State Warriors gumikan kay gawas nga nahisukamod sila sa mga kamot sa Washington Wizards, 112-108 sa NBA kagahapon didto sa Verizon Center, nayayay sab ang bitoon nilang si Kevin Durant.

Nagtakiang nga migawas sa duwa si Durant sa unang kuwarter human  sa aksidente pagkahagba sa iyang teammate nga si Zaza Pachulia ngadto sa wala niyang  paa.

Gikompirmar dayon sa Warriors nga si Durant naangol gyud ug gikatakda kining mopaubos sa MRI scan aron matino kun unsa ang iyang kondisyon.

Gipahimuslan sa Wizards ang higayon nga napiangan ang Warriors dayon na  sa pag-inat sa ilang rekord ngadto sa 35-23 ubos sa pagpangu ni Bradley Beal nga mirehistro og 25 puntos, tulo ka assists ug upat ka rebounds.

Si Markieff Morris midugang og 22 puntos, unom ka rebounds ug usa ka assist, samtang si John Wall  miamot og  12 puntos, 19 ka assists ug unom ka rebounds.

Si NBA MVP Stephen Curry mikamada og 25 puntos, pito ka rebounds  ug upat ka assists. Mitali sab og double figures silang  Klay Thompson  nga adunay 16 puntos,  Draymond Green   ug Shaun Livingston nga mitampo’g 14 puntos matag usa ug Pachulia nga adunay 12 alang sa Warriors nga hingpit nang nakasud sa playoffs.

Sa laing duwa, si Russell Westbrook mikulit sa ika-30 niyang triple double karon nga season sa dihang gipakaging sa Oklahoma City Thunder ang Utah Jazz, 109-106. Si Westbrook nagbarog na karon isip ikatulong player sa kasaysayan sa NBA nga dunay labing daghan nga triple-double sa usa ka season

Ang rekord nga 41 ka triple-double gikuptan gihapon ni Oscar Robertson nga miposte niini niadtong 1961-1962 season ug nagsunod si Wilt Chamberlain nga dunay 31 ka triple-double niadtong 1973-1974 season.

Kagahapon didto sa Chesapeake Energy Arena sa Oklahoma City, si Westbrook mipatuasik og 43 puntos, 11 ka rebounds ug 10 ka assists alang sa ika-67 nga triple-double sa iyang karera.

Nakaangkon og igong suporta si Westbrook gikan nilang Doug McDermott ug Enes Kanter nga nagkumboya’g 31 puntos alang sa Thunder nga aduna na karo’y  35-25 nga baraha. (BANAT NEWS)