Freeman Opinion ( Leaderboard Top ), pagematch: , sectionmatch: 1

Pagkalimot sa kagahapon

Kon may nagduda pa hangtod karon, gipamatud-an na sab sa pamunoan ni Presidente Rodrigo Duterte ang ilang determinasyon sa pagpatuman sa dagkong kausaban. Gawas sa pag-usab sa batakang balaod ug sa sistema sa gobyerno, giduso sab nila ang mosunod:

• Sublion ang tanang kaso nga gipasaka sa pamunoan ni kanhi Presidente Noynoy Aquino, labi na kon ang mga sinumbong ilang mga alyado; ug

• Isipon nang Edsa People Power Revolution nga kabahin na lang sa kagahapon busa di na hatagan og samang importansiya kay palabihon nang pagtan-aw sa umaabot.

* * *

Kabahin sa pagsubli sa nangaging mga kaso mao ang pagpangita og buslot sa mga ebidensiya batok sa ilang mga alyado nga nahipos sa niaging pamunoan:

• Maong gihangop ni Duterte ang paggawas sa prisohan ni kanhi Presidente Gloria Macapagal-Arroyo;

Freeman ( Article MRec ), pagematch: 1, sectionmatch:

• Maong gikataho nga gipasaligan sab si Senador Bong Revilla nga siya ang sunod nga makalingkawas sa kasong plunder; ug

• Maong nagtinguha si Solicitor General Jose Calida sa pag-absuwelto sa gipasanginlang pork barrel queen nga si Janet Lim Napoles gikan sa pagka konbikto sa ilegal nga pagtanggong sa whistleblower nga si Benhur Luy.

* * *

Hagbay rang nipasidaan si Presidente Duterte nga iyang sublion ang P10 bilyones nga pork barrel cases ni Napoles uban ang pasumbingay nga ang pagsubli mahimong mosangpot sa mas pagpalig-on pa sa mga kaso batok sa higpit niyang karibal nga si Senador Leila de Lima.

Ang pagdapig ni Calida kang Napoles makapakugang. Apan igo lang nidason sa pasidaan ni Duterte niadto pang Agosto, unom ka buwan nang nilabay. Way kalainan sa paghatag og immunity sa konbiktadong mga piniriso sa New Bilibid Prison bugti sa ilang testimoniya batok ni de Lima.

* * *

Ang awhag sa Malakanyang nga inanay nang pakalimtan ang People Power Revolution nisunod sa pagbisto ni kanhi Presidente Fidel Ramos nga pahiyuson ang ika-31 nga anibersaryo ug himuon na lang sud sa Kampo Aguinaldo inay sa naandang mas dakong luna sa Edsa Shrine.

Gikabalak-an nga kabahin sa inanayng paghikalimot ang ilang pagpayuhot og lubong sa patayng lawas ni kanhi Presidente Ferdinand Marcos sa Libingan ng mga Bayani, ang pagsubli-subli og pasidungog sa diktador ug ang nag-ung-ong nga pagtudlo ni kanhi Senador Bongbong Marcos sa gabinete.

Freeman ( Article MRec ), pagematch: 1, sectionmatch:
  • Follow Us: