Mga utokan man unta, apan….

Dili malalis nga utokan ang mga nagdumala sa Cebu City Transportation Office, apan kay naulipon man sila sa mga nagpasiugda niining night market diha sa Colon Street, dili na tukma ang ilang baruganan.

Bisan og ang maong night market nakahatag og kasamok sa dagan sa mga sakyanan, moingon gihapon nga wala makahasol ang night market sa trapiko. Pastilan, naulipon sila sa kahadlok sa mga nagpasiugda sa night market.

Nakaila na ako kinsa ang nagpaluyo sa night market diha sa tumoy nga bahin sa Colon, mao diay nga si Mayor Tomas Osmeña magpangikog sa pagbalibad kay suod diay kaayo siya sa mayor.

Ang kalipay sa pipila lang ka tawo, dili maayong ibaylo sa grabeng sakripisyo nga masinati sa kinabag-ang publiko, mga motorist ug mga sumasakay nga mahasol tungod niining paggamit sa karsada nga himoong merkado panahon sa gabii.

Tingali gusto lang nila ni Mayor Osmeña ug sa iyang sinaligan nga si Francisco “Bimbo” Fernandez nga mahinangop kanila ang mga gagmay’ng negosyante nga makapamaligya sila diha sa karsada.

Tinuod, nangalipay ang pipila ka negosyante kay makapamaligya man sila diha sa karsada nga para gyud unta sa mga sakyanan, bugti sa pagbagulbol sa mga motorista ug mga sumasakay.

Gikonsulta kuno ang mga opisyal sa CCTO kon dili ba makahasol sa trapiko ang pagpahigayon sa night market. Tungod sa ilang kamaikugon, o kaha nahadlok nga matangtang sa trabaho kay dumtan sa nagpasiugda sa night market, napugos paglingla sa ilang kaugalingon ug miingon nga dili hasol sa trapiko ang night market.

Kun ang kadagkoan sa CCTO mosulti lang gyud sa tinuod nga sitwasyon nga ang night market nakamugna og kahasol sa mga motorista, tingali pugngan gyud sa mayor ang pagpahigayon og night market dihang dapita.

Ang nakapasakripisyo gyud kay ang mga sakyanan nga nagsubay sa dalan Sikatuna nga mopaingon unta sa eskena Colon, lahus na sa Mabini Street paingon sa Cathedral, dili na makaagi kay sirad-an man nila diha pa sa Parian Barangay Hall.

Ang tanang motorista palikuon nila sa tuo ngadto sa España Street, dayon liko na usab sa tuo sa D. Jakosalem Street ug magpili kini kon moliko ba sa wala paingon sa Sanciangko o kaha diretso sa D. Jakosalem.

Nganong nakaingon ko nga wala nila gamita ang ilang utok? Kon pugson nila nga adunay mapahigayon nga night market sa Colon, ilabi na og adunay mga tawo nga nakasapi niana, ayaw iapil ang bahin sa Sikatuna Street.

Kinahanglan nga ang mga sakyanan makapadayon pag-agi sa Sikatuna alang niadtong mopaingon sa Cathedral o kaha moliko didto sa eskina V. Gullas Street paingon sa downtown.

Angay’ng hinumdoman ni Mayor Osmeña nga gipili siya sa kinabag-ang katawhan ug dili kay niana lang pipila ka tawo nga malipay sa pagpahigayon og night market kay sila makaganansya ug may ubang tawo nga makakuwarta.

***

Gitawag ko ni Kapitan Imok Rupinta sa Barangay Ermita ug gipahibalo nga niining pagpasangil nga siya drug protector, ug gipasakaan siya’g kaso, paspasan ba niya ang kampanya batok sa gidiling drugas sa iyang barangay.

Tuohan nato nga paspas na ang kampanya ni Kapitan Imok sa problema sa illegal nga drugas, apan bahin sa illegal nga sugal nganong wala may gihimo ang iyang mga tanod?

Wala malilong kanako nga midagsang pag-ayo ang mga video karera ug moli-moli diha sa iyang barangay, ilabi na sa Sitio Bato ug Sitio Ermita Beach. Bi, ngano nga wala man kini himoi nila og kampanya.

Ang kapolisan usab diha sa Carbon Police Station molihok lang kon adunay lindog sa mantalaan, apan kahibudngan kay mabalik ra man usab dayon ang maong mga video karera ug moli-moli base sa akong mga tigpaniid.

Bisan diha sa Barangay Pasil, Barangay Suba ug Sawang Calero, nagpadayon ang illegal nga sugal. Sa Duljo-Fatima, daghang karera ang naapil sa pagkaugdaw.

CCPO Director Joel Doria, papaspasi pa ang kampanya batok sa illegal nga sugal!

[email protected].