Hiwalay
Dear Dr. Love,
Una sa lahat, ipinauuna ko na ang pasasalamat sakaling mabigyang-daan ang aking sulat sa inyo. Kasabay nang pagbati ko ng mabiyayang araw sa inyo at sa mga tagasubaybay ng inyong kolum.
Huwag n’yo nang buuin ang aking pangalan at tawagin n’yo na lang akong Gilda, 34-anyos at mistulang biyuda sa buhay. Dahil hiniwalayan ako ng aking mister, two years ago at iniwan sa akin ang nag-iisa naming anak na lalaki na ngayo’y five years old na.
Balita ko ay may kinakasama siya ngayon na ibang babae. Hindi siya nagpapadala ng sustento sa aming anak at mag-isa kong itinataguyod ang bata na inaalagaan ng aking mga kapatid habang nagtatrabaho ako bilang janitress sa city hall.
Gusto ko pong idemanda siya. Hindi po ba concubinage ang tawag kapag ang lalaking kasal ay nakiapid sa ibang babae?
Ano po ang dapat kong gawin?
Gilda
Dear Gilda,
Isang usaping legal iyan at wala akong kakayahang magpayo maliban sa payong komunsulta ka sa abogado. Dalawang bagay lang ang puwede mong gawing legal action. Ang maghabol ng sustento o kaya’y ihabla mo siya para siya makulong.
Pero siyempre may gastos iyan. Gayunman, kung sa city hall ka nagtatrabaho, bakit ‘di ka kumunsulta sa public attorney’s office na nagbibigay ng libreng legal assistance.
Dr. Love
- Latest