Mister niratrat sa loob ng bahay
MANILA, Philippines - Patay ang isang 46-an-yos na mister na nasa drug watchlist matapos itong pagbabarilin ng hindi kilalang mga suspect mismo sa loob ng bahay nito sa Pasay City, kamakalawa.
Dead-on-arrival nang dalhin sa Pasay City General Hospital (PCGH) ang biktimang si Arnold Buenaventura, alyas Atong, nagtamo ito ng ilang tama ng bala sa iba’t ibang bahagi ng katawan buhat sa hindi pa batid na kalibre ng baril.
Blanko pa ang pulisya sa pagkakakilanlan ng mga suspect.
Sa report na natanggap ng Southern Police District (SPD), naganap ang insidente alas-5:00 ng hapon sa loob ng bahay ng biktima sa Brgy. 147, Zone 16 ng naturang siyudad.
Nagpapahinga umano ang biktima nang biglang pumasok ang grupo ng mga kalalakihan na armado ng baril at walang sabi-sabing pinagbabaril ang una. Mabilis na tumakas ang mga salarin makaraang matiyak na patay na ang biktima.
Sa rekord ng Pasay City, nasa drug watchlist nila ang pinatay na biktima. Iniimbestigahan ang natu-rang insidente.
- Latest