US Visa ug Chinese Lauriat

Akong higala nga nabalibaran sab sa iyang aplikasyon sa US visa makasimpatiya ni Presidente Rodrigo Duterte. Makatugkad siya sa hingpit nga kalawom sa kahiubos ug kahimangod ni Duterte, dihang gibalibaran sa US Embassy ang iyang tinguha sa pagbiyahe ngadto sa Estados Unidos aron pagduaw sa iyang hinigugma dihang tinun-an pa sa kolehiyo.

Matud sa akong higala, nahiubos ug nahimangod sab siya pag-ayo dihang gibasura ang iyang visa application human sa dakong gasto sa ayroplano, hotel ug pagpangadlawon og linya sa embahada daghang katuigan na ang nilabay.

Tungod sa kaguol, nag-inom siya ug nangita og away sa ilang mga silingan. Matud niya, sa iyang sitwasyon ang iyang pamilya ra’y nauwawan apan sa sitwasyon ni Duterte ang tibuok nasud ug tanang katawhan ang naduhig.

* * *

May mga sektor sa katilingban nga gihilasan sa pangangkon ni Presidente Barack Obama ug ubang kadagkoan sa Estados Unidos nga giisip nila ang Pilipinas nga labing suod nga higala ug alyado sa Asya.

Ilang gidasonan ang reklamo ni Duterte nga samtang labihang lisora ang pagkuha og US visa, labihang sayona alang sa mga Amerikanhon ang pag-anhi sa Pilipinas, igo ra nga mopakita sa ilang pasaporte, wa kinahanglanang bisan unsang visa.

Gawas sa kalisod sa mga aplikante pagkumbinser sa US consuls, kansang desisyon lisud na nga kuwestiyunon kay dili man sila kinahanglan nga mopasabot ni mohatag og sukaranan, puwerteng dakoa sab sa bayranan sa visa sa US kun itandi sa gipaningil sa ubang kanasuran.

Pananglitan, US$160 (P7,700) ang US visa, hangtod kalima pil-a ang US$30 (P1,500) nga presyo sa visa sa China.

* * *

Kining salikwaot nga kahimtang makapatumaw og dugang pangutana:

* Kun mao nga labihang lisura ang pag-adto sa Estados Unidos ug labihang sayona ang pag-anhi sa Pilipinas, nganong mas daghan man ang mga Pilipinhon nga moadto sa Estados Unidos kay sa mga Amerikanhon nga manganhi sa Pilipinas?; ug

* Kun mao nga labihang mahala sa visa sa US ug labihang baratoha sa visa sa China, nganong mas daghan man nga Pilipinhon ang nagpuyo sa Estados Unidos (sa labing uwahing ihap, 4 milyones) kay sa mga Pilipinhon nga nagpuyo sa China (sa labing uwahing ihap, 15,000)?

* * *

Sa wa pa magsugod ang upat ka adlaw niyang state visit sa China, nireklamo si Duterte sa kadako sa kalainan sa nangagi niyang mga tigum uban sa mga opisyal sa Estados Unidos ug China: "Mag-miting ka sa mga Amerikano, paimnon lang ka og tubig; sa mga Insek, lauriat! Snack pa lang na!"

Tungod ug alang sa kaayuhan sa nasud ug kaugmaon sa umaabot nga kaliwatan, tim-os ta nga mangaliya nga may mas lawom nga mga sukaranan ang bag-ong foreign policy ni Duterte kay sa wa paghatag niya og visa ug sa iyang kaibog sa lauriat.

 ([email protected])