“Hitman” ni Jaguar nadakpan

CEBU, Philippines - Usa sa unom ka mga tawo nga nasikop atol a gipahigayon nga buy-bust operation sa kapulisan sa Subangdako Police Station nga gipangulohan sa ilang hepe Police Chief Inspector Genilo Veraque diha sa may Barangay Tipolo, Mandaue City ang giingong hitman ni anhing Jeffey “Jaguar” Diaz.

Ang nasikop mao sila ni Arnulfo Miel ,32, taga Banahaw Street, Singson Village, Tipolo Mandaue, Jerome Gonzaga, 28, Romy Ramas, 31, Argesa Pegarido, 29, Liezl Saraum, pulos taga Cebu City ug Jahara Peromingan, taga Talisay City.

Matud pa ni Veraque, dul-an sa duha ka bulan ang pagpaniid sa grupo ni Miel nga dili mobaligya sa ilang mga silingan kung dili ngadto sa mga tawo nga magmotor ug mag- auto. Nakuha gikan sa mga dinakpan ang armas nga KG 9 submachine pistol, mga bala, drugas ug gamit pagsuyop.

Ipasuta sa crime lab ang armas nga nakuha ug susihon usab nila kung unsay mga kaso nga giatubang sa mga dinakpan.

Gitug-an ni Veraque, ang mga babaye nga nadakpan nangangkon kini nga igo lang sila gibayran sa mga lalaki ug wala silay kalabutan sa ilegal nga drugas.

Gibutyag ni Veraque, si Gonzaga kanhi hitman ni Jaguar ug ilang gisusi ang impormasyon nga usa kini sa mga suspek sa pagpanulis sa LBC –Taboan kaniadto.

Si Miel nagdumili pagtubag sa media samtang si Gonzaga nihimakak nga hitman siya ni Diaz. Matud niya igo ra siya nibisita sa balay ni Miel.

Samtang kinse ka mga tiggamitan og ilegal nga drugas apil ang usa ka 17 anyos nga drug pusher ang nasikop atol sa buy-bust operation diha sa Duljo-Fatima ning siyudad sa Sugbo.

Gironda sa mga sakop sa Philippine Drug Enforcement Agency -7 ang duha ka drug dens nga ang usa gipanag-iya sa 17 anyos ug ang usa gipanag-iya ni Gionvanni Catipay, 41.

Matud ni Lea Aguilar, Public Informations officer sa Philippine Drug Enforcement Agency nga duha na ka semanang gibantayan ang maong mga suyopanan.

Nakuha sa 17 anyos ang 15 ka mga paketeng shabu nga mobalor og dul-an P90 mil samtang 18 ka pakete ang nasakmit gikan kang Catipay nga mobalor og P108 mil.

“Nag-estambay ra ko. Nanigarilyo,” pangangkon pa sa 17 anyos nga suspek kinsa miingon nga usa siya ka estudyante ug wala siya masayod nga suyopanan kadtong balay nga iyang gi-estambayan. Sama kaniya, nilimod usab si Catipay sa akusasyon sa PDEA.

Nasikop sa drug den ni Catipay sila si: Reniel Lim, 33, nagpuyo sa Basak Pardo, Cebu City; Martin Cuava, 38, taga Subangdaku, Mandaue City; Marvin Buenavista, 27, nagpuyo sa Basak San Nicolas, Cebu City; Ramee Estrera, 40, taga Duljo-Fatima; John Red Vildosala,31 ug Jeffrel Mabitad, 23 nga puros nagpuyo sa Pardo, Cebu City. Samtang nasikop sad sa drug den sa 17 anyos sila si Marces Garces, 28, nagpuyo sa Cabancalan, Mandaue City; Mario Nemeño Jr., 27 ug Anthony Andrew Mabatid, 36 parehang nagpuyo sa Minglanilla, Probinsya sa Sugbo; Jerameel Wagas, 37, taga Compostela, John Mark Labrador, 23 gikan sa Basak San Nicolas, Cebu City ug ang nag-inusarang babaye nga si Christine Navaja, 29, taga Mambaling. Rowena Capistrano ug Camille Pateres (BANAT NEWS)