Aulga Hardware, AC Sports midaog dayon sa GG50’SBC Cagefest
CEBU, Philippines - Gisugat dayon og daog ang Aulga Hardware ug ang AC Sports sa una nilang duwa sa Guadalupe Golden 50’s Basketball Club First Conference niadtong Domingo sa hapon didto sa Guadalupe Sports Complex.
Ang Aulga Hardware walay kukaluoy nga midemolis sa Tisa Top sa iskor nga 82-68.
Upat ka players sa Aulga Hardware ang miiskor og double figures pinangulohan ni Gaga Cabanilla nga miariya og 15 puntos.
Mihimo sab og double digits performance silang Bual, Miñoza ug Cortez nga parehong nagtampohay og 10 puntos.
Miiskor unta og 27 puntos si Freddie del Campo, apan wala kini kapahimusli kay ang Tisa Top nahisugamak.
Laing duha niya ka teammates nga sila si Seno ug Tañeza mitampo’g 16 ug 12 puntos matag usa sa napildeng Tisa Top.
Sa laing aksiyon, ang AC Sports gilihian sab og daog sa dihang ilang giihaw ang Tejero Bulldogs sa iskor nga 72-57.
Kuyaw kaayong nakaduwa si Abejo diin mipatuasik siya og 20 puntos aron pangulohan ang AC Sports, si Ybañez mitikdol og 11 puntos ug si Lalican mitimang og 10 puntos sa kadaugan.
Ang naparot nga Tejero Bulldogs gipangulohan sab nilang Tudtud ug Solon nga nagkumboya’g 27 puntos.
Ang liga nahimo sa paningkamot nilang Serge Cortez ug Raul Sollano, inabagan nilang Lito Posadas ug Gaga Cabanilla isip chairman. Ang duwa gipadagan ni technical committee Edwin Dejacto Sr.
Puntos matag usa
Unang duwa:
AULGA Hardware (82) – Cabanilla 15, Bual 10, Miñoza 10, Cortez 10, Bihag 8, Galon 7, Posadas 6 Aulga 5, Diola 4, Lawas 4, Arias 3.
TISA Top (68) – Dela Campo 27, Seno 16, Tañeza 12, Lazaga 8, Nomio 4, Petallar 1.
Ikaduhang duwa:
AC Sports (72) – Abejo 20, Ybañez 11, Lalican 10, Ortega 9, Rabaya 7, Tarle 6, Que 4, Sison 3, Polancos 2.
TEJERO Bulldogs (57) – Tudtud 15, Solon 12, Ferraren 9, Ocampo 6, Baya 4, Amen 4, Gayoca 4, Auditor 3. (BANAT NEWS)
- Latest
