Perps Squad puntirya ang ika-10 titulo

MANILA, Philippines -  Ipagtatanggol ng University of Perpetual Help System Dalta ang kanilang korona sa NCAA Season 92 Cheerleading Competition na lalarga ngayong araw sa Mall of Asia Arena sa Pasay City.

Magsisimula ang programa sa alas-3 ng hapon kung  saan unang masisilayan ang Jose Rizal University kasunod ang Perpetual Help.

Ikatlong sasalang ang Lyceum of the Philippines University kasunod ang Emilio Aguinaldo College, Arellano University, San Beda College, Mapua Instutute of Technology at College of St. Benilde.

Hindi lalahok ang Colegio de San Juan de Letran at San Sebastian College sa taong ito.

Nasungkit ng Perp Squad ang titulo noong nakaraang taon matapos maglatag ng matikas na routine, stunts at tosses upang makalikom ng 195 puntos.

Nasa dikit na ikalawa ang 2014 champion Arellano Chief Squad na nagsumite naman ng 193 puntos.

Target ng Perpetual Help na makuha ang ika-10 kampeonato sa cheerleading.

Sa katunayan, tatlong edisyon lamang hindi nagkampeon ang Perpetual Help - noong 2004, 2008 at 2014 na pinagharian ng Mapua, Jose Rizal at Arellano, ayon sa pagkakasunod.

“We will give it our very best to preserve the tradition of Perpetual Help in NCAA cheerleading,” pahayag ni Perpetual Help coach Ruf del Rosario.

Inaasahang magbibigay ng magandang laban ang Perpetual Help at Arellano ngunit handa rin ang ibang koponan na makapagbigay ng pinakamahusay na performance upang makahirit ng upset win.

“Our team have prepared hard so expect a very exciting competition,” wika naman ni Peter Cayco, ang Arellano representative sa NCAA Management Committee.