Sadorra, Paragua nagdomina sa Chesapeake chessfest
MANILA, Philippines - Dinomina ng mga Filipino Grandmasters na sina Julio Catalino Sadorra at Mark Paragua ang 9th Chesapeake Open Chess tournament na ginanap kamakailan lang sa Chesapeake, Maryland, USA.
Kapwa nagwagi sina Sadorra at Paragua sa magkahiwalay na laban sa ikapito at huling round ng torneo para masungkit ang parehong anim na puntos at magsosyo sa titulo.
Tinalo ng 30-anyos na si Sadorra ang International Master na si Tegshsur Enkhbat habang nanalo naman ang 32-anyos na si Paragua laban sa kapwa Filipino GM na si Oliver Barbosa para manatiling walang talo. Si Paragua ay nanalo ng apat na beses at mayroong dalawang tabla sa buong torneo.
Ito na ang unang korona ni Sadorra sa US sa taong ito makaraang kumolekta ng siyam na titulo sa nakalipas na taon.
“I’m happy to win it with a countryman and a childhood friend,” sabi ni Sadorra, isang Business Administration graduate sa University of Texas noong 2013.
Ayon kay Sadorra, tumabla kay reigning world chess champion GM Magnus Carlsen ng Norway sa nakaraang World Chess Olympiad sa Baku, Azerbaijan, ang naturang torneo ay para sa kanyang preparas-yon para sa darating na Asian Chess Zonals na gaganapin dito sa Pilipinas ngayong Pebrero at sa Asian Continental Championship sa Marso.
“I’m joining in these two events which will serve as qualifiers to the World Cup,” dagdag ni Sadorra.
Kahit talo, si Barbosa ay tumapos pa rin sa ika-pitong puwesto sa kanyang kabuuang apat na puntos. (FCagape)
- Latest
