Tiniyak ni Duterte: Pinas hindi makikipag-giyera sa China
MANILA, Philippines - Tiniyak kahapon ni Pangulong Rodrigo Duterte na hindi makikipag-giyera ang Pilipinas sa China.
Ginawa ng Pangulo ang pagtiyak sa isang pulong-balitaan sa Davao City bago siya tumulak patungong Saudi Arabia kahapon.
Ayon sa Pangulo, maaring mag-relax ang China dahil hindi naman makikipag-giyera ang Pilipinas, sa halip nais lamang nitong panatilihin ang balanse sa geopolitical situation sa West Philippine Sea.
Tiniyak din niya sa China na hindi maglalagay ang pamahalaan ng “weapons base” o mga armas sa mga islang pag-aari ng Pilipinas sa South China Sea.
“Naroon lang tayo para angkinin ang isla para sa atin dahil atin talaga iyon at inutos ko sa AFP na magtayo ng mga istruktura doon para ipakitang atin ito,” wika pa ng Pangulo.
Hiniling din ng Pangulo sa Beijing na unawain ang posisyon ng Pilipinas dahil na rin sa isyu ng kanya-kanyang pagkamkam ng mga teritoryo.
Ang pahayag ng Pangulo ay kasunod sa naging kautusan nito sa AFP na okupahan ang mga isla ng Pilipinas na inaangkin naman ng China sa SCS at tayuan ng bandila ng Pilipinas.
Binanggit din ng Pangulo na pagbalik niya mula sa kanyang pagbisita sa Gitnang Silangan ay lalagdaan niya ang isang executive order na opisyal na nag-aatas na tatawiging Philippine Ridge ang pangalan ng Benham Rise, ang 13-million hectare underwater plateau na nasa 250 kilometers east ng Dinapigue, Isabela.
Unang sinabi ng Pangulo na kailangang imantine at pangalagaan ng Pilipinas ang hurisdiksyon nito sa SCS.
- Latest
