Wala’y klaro

Kaniadtong tuig 2001, ang Dangerous Drugs Board (DDB) ug ang Philippine Drug Enforcement Agency (PDEA) mipahibalo nga miabot na sa kinatibuk-ang 3.4 milyones ang adik sa Pilipinas ug 1.8 ka milyon kanila mga regular drug users samtang ang 1.6 ka milyon mga occasional users.

Karon kun imo nga paminawon ang pamahayag ug tan-awon ang lista sa DDB ug PDEA, mao ra gihapon ang gidaghanon sa mga adik ug adik-adik sa tibuok nasud nga ilang nalista.

Gilansangan sa nahisgotang anti-drug body ang gidaghanon sa mga apektado sa gidiling drugas. Milabay na ang 15 ka tuig pero mao lang ba gihapon ang ilang gidaghanon?

Unsa man, naghimo ba ang PDEA ug DDB sa ilang trabaho? Ang numero mahinungdanon kaayo sa mga programa ug patakaran nga ipatuman sa gobiyerno may kalambigitan sa kampanya batok sa suliran sa gidiling drugas tungod kay anhi dinhi kini magbase.

Apan wa’y klaro ang ilang numero. Si Presidente Rodrigo Duterte nagsige og sangyaw sa nasud ug sa kalibotan sa gidaghanon sa mga naapektohan sa suliran sa gidiling drugas, pero wala siya’y klaro nga numero sa tinuod gayod nga gidaghanon sa mga adik ug adik-adik.

Ang numero nga gipahibawo sa presidente gibase lang sa hangad-hangad sa taga PDEA ug DDB. Nagtuo ko nga mas daghan pa ang mga adik ug adik-adik karon sa nasud kun ikomparar sa antik na nga lista nga gihatag sa DDB ug PDEA.

Mao nga akong awhagon ang duha ka anti-drug body sa pagtrabaho gyud aron paghipos og mga kasayoran sa bag-ong gidaghanon sa mga apektado sa gidiling drugas.

Mahimo kini pinaagi sa pagpakig-alayon sa mga rehabilitation centers ug mga tambalanan nga kasagaran maadtoan sa mga apektado sa gidiling drugas aron makabaton og konkreto nga basehanan sa paghimo niini og mga programa para sa suliran sa gidiling drugas.