Recto: Pinas BPO superpower pero walang 24/7 government call center

MANILA, Philippines – Maaaring ang Pilipinas ang Business Processing Outsourcing (BPO) sa mundo pero ang pamahalaan nito ay walang unified 24-hour call center na maaaring sumagot sa mga tanong sa often-transacted documents o often-sought services.

Ayon kay Sen. Ralph Recto, dapat ikonsidera ng bagong administrasyong manunungkulan sa Hunyo 30 ang pagsasama-sama ng mga resources ng panguna­hing 10 ahensiya ng pamahalaan pagdating sa clientele base para sa pagbuo ng isang common hotline service.

Makikinabang anya sa ganitong hotline o government call center ang mga gumagamit ng mga pampublikong dokumento.

“Kung isa kang overseas contract worker, dapat meron kang matatawagang isang numero na ililipat ang tawag mo sa kaukulang ahensiya sa halip na mag-aksaya ng maraming oras sa trapiko sa pagtungo sa mga tanggapan ng POEA, OWWA,  MARINA, NBI, TESDA, SSS at marami pa,” wika pa ng senador. Kinilala naman ni Recto ang mga 24-hour hotline ng GSIS, PAGIBIG at SSS pero kailangan nitong magkaroon ng marami pang  customer care representatives dahil sa dami ng kustomer na gumagamit.