EDITORYAL - E-Bikes sa kadalanan

Dili moabante ang kaugmaran sa usa ka lugar kun walay transportasyon. Makita karon nga pwerte nang daghana sa mga nagdagan nga mga sakyanan ug motorsiklo sa kadalanan.

Apan diay bag-o nga makita karon, kining mga electric bikes o e-bikes nga mapalit sa mas baratong presyo kun itandi sa regular nga motorsiklo.

Tinuod ekonomiya kini tungod kay chargeable batteries ra man maoy nagpadagan niini ug di na kinahanglang magpagasolina o krudo.

Ug labaw sa tanan eco-friendly kini kay way aso nga makatampo sa polusyon ug way saba nga mga elemento nga gipangita sa mga environmentalists.

Apan samtang giestrikto sa Land Transportation Office ang mga magsakay og motorsiklo, daw wala estriktoha ang mga riders niining e-bikes.

Usa niini ang pagkuha og lisensya, ikaduha, wala usab gi-require pagsuot og safety helmets, gani wala usab sila estriktoha sa pagbaton mga safety features sa ilang mga e-bikes sama sa signal lights, headlights, busina ug uban pa nga gi-require sa mga magmotor.

Apan ang e-bikers wala gi-require niini kay siguro giisip kini nga kabahin sa kategoriya sa bisekleta.

Di mahimong moingon lang ta nga responsibilidad na kana sa riders kay bisan wala sila sa kategoriya sa mga sakyanan sa LTO apan dili ikalimod nga mokaon usab sila og espasyo sa karsada.

Sama sa ubang mga sakyanan ilabi na sa motorsiklo nagdala usab og risgo sa aksidente ang mga e-bikes.

Mahimong sila makabangga o sila maoy madasmagan. Unsa may kalainan sa ilang tulobagon kun malambigit sila sa disgrasya? O sa mas grabe, unsay kalainan sa magsakay og motorsiklo nga malatayan sa trak ug kanilang mga e-bikers?

Maayo kining e-bikes ug dili kinahanglang i-ban sa karsada kay dako kini og natabang sa mga tawong dili makapalit og mga sakyanan o motorsiklo.

Apan kinahanglang maghimo og mga tamdanan alang sa ilang kaluwasan sa kadalanan ug kaluwasan sa ubang motorista.