Viral video
CEBU, Philippines — Trending gihapon sa social media ang video sa pagpakasal og balik nila ni Teddy Corpuz ug sa asawa niini nga si Jasmine nga nahitabo sa programang It’s Showtime niadtong Martes. Sa maong episode , nakahilak ang mga tawo sulod sa studio.
Gerald nanalipod kang Arci
Gipanalipdan ni Gerald Anderson ang kanhi niya nga ka-loveteam nga si Arci Munoz kinsa gi-bash gumikan sa pagparetoke sa nawong niini. Suma pa ni Gerald nga usa ka maayong tawo si Arci busa gihangyo niya ang bashers nga mohunong na sa pagtamay-tamay niini.
Matteo mihimakak
Hugtanong gihimakak ni Matteo Guidecilli ang nitumaw nga tsika nga nibiya na si Sarah Geronimo sa ilahang balay gumikan kay nakalalis matud pa ang ginikanan niini. Una na nga nitumaw ang tsika nga matud pa istrikto gihapon ang ginikanan ni Sarah kalabot sa lovelife niini.
Magpakasal og balik
Subling magpakasal ang kanhi housemate sa Pinoy Big Brother nga si Niña Jose ug sa bana niini nga si Bayambang, Pangasinan Mayor Cezar Quiambao. Ang ilang ikaduha nga kasal mahitabo karong November 15, 2017.
David gihangop
Gikagubtan sa mga Pinoy ang pag-abot sa American singer nga si David Archuleta dinhi sa Pilipinas sa miaging adlaw. Aduna’y concert si David sa Kia Theater ugma sa gabii , October 20.
P100M na!
Mikita na og kapin sa P100 million ang pelikulang Seven Sunday sulod lang sa pito ka adlaw nga pagpasalida niini sa mga sinehan. Ang maong pelikula sa Star Cinema gibidahan nila ni Cristine Reyes, Aga Mulach, Enrique Gil, ug Dingdong Dantes.
Andam moretiro
Target sa Pinoy rock star nga si Pepe Smith nga mogahin og dakong oras sa pag-arte kun madayon iyang plano nga moretiro sa pagkanta. Una na nga gibutyag ni Pepe nga nag-enjoy na siya og maayo sa iyang singing career sulod sa taas nga katuigan.
Kinsa kaha?
Giangkon sa Kapuso star nga si Kim Rodriguez nga exclusively dating sila karon sa usa ka aktor nga naa sa laing istasyon. Wala gibutyag ni Kim ang pangalan sa maong aktor aron malikay sila sa intriga.
Awhag ni Baron
Dili gyud mohunong si Baron Geisler sa pag-awhag sa tag-iya sa resto bar nga kinahanglan ipagawas gyud ang footage nga kuha sa CCTV camera aron masuta ang kamatouran. Kahinumdoman nga napriso si Baron human nakakita og kagubot sa usa ka resto bar sa Quezon City niadtong Lunes sa gabii.
Special gift
Gikatahong giregalohan ni John Lloyd Cruz og mahalon nga singsing ang Cebuana star nga si Ellen Adarna. Hagbay ra nga gidungog nga nagkalig-on ang relasyon sa duha human sa pagsige nila og bakasyon.
“Wansapanataym” nominado sa Emmy
Nakalangkat og nominasyon ang show sa ABS-CBN nga “Wansapanataym” alang sa best TV movie/mini-series category sa 2017 International Emmy Kids Awards.
Pormal kini nga gianunso sa miaging adlaw sa International Academy of Television Arts and Sciences.
Partikular nga nakakuha og nominasyon ang episode sa “Wansapanataym” nga nag-ulohan og “Candy’s Crush” nga gipasalida niadtong June 2016. Gibidahan kini nila ni Loisa Andalio ug Jerome Ponce.
Ang “Wansapanataym” maoy nag-inusarang Philippine TV show nga nakakuha og nominasyon sa International Emmy Kids Awards karong tuiga.
Motigi kini sa entries sa Netherlands, United Kingdom, ug Australia.
Ed Sheeran naaksidente
Gikumpirmar sa British singer/songwriter nga si Ed Sheeran nga gikanselar ang pipila niya ka mga concert gumikan sa iyang pagka-aksidente samtang nagbisikleta didto sa London.
Dili madayon ang iyang concert sa Taiwan, Japan, South Korea, ug Hong Kong.
“I’ve had a bit of a bicycle accident and I’m currently waiting on some medical advice, which may affect some of my upcoming shows,” matud pa ni Ed.
Samtang nag-obserbar sa iyang kondisyon, wala pa siya kahukom sa iyang mga concert sa Thailand, India,ug Pilipinas.
Matud pa nga nabalian gyud ang iyang kamot ug ang iyang siko gumikan sa maong insidente.
Gikatakda nga mag-concert ang singer sa MOA Ground karong November 7.
Human sa Pilipinas, naka-schedule siya nga mag-concert sa Singapore ( November 11), Kuala Lumpur (November 14) ug Dubai ( November 23). (BANAT NEWS)
- Latest