Kinsay “Meant To Be”?

CEBU, Philippines - Mibisita dinhi sa Sugbo niadtong Sabado ang mga bida sa umaabot nga GMA-7 light romance drama “Meant To Be.” Kauban ni Kapuso best actress ug Drama Sweetheart Barbie Forteza dinhi sa Sugbo ang tulo sa upat niya ka leading men nga sila si  Jak Roberto, Addy Raj, ug Ivan Dorschner.

Gilingaw nila ang ilang mga fans dinha sa Gaisano Capital-SRP sa Talisay ug Gaisano Capital-South dinhi sa dakbayan sa Sugbo.

Nasayran nga ang ikaupat nga leading man ni Barbie niining maong serye mao ang iyang higala usab nga si Ken Chan kinsa nisikat pinaagi sa serye nga “Destiny Rose” sa nilabay nga tuig. Magsilbi usab nga reunion kining maong maong serye alang sa sikat nga 90’s Triplets nga gilangkuban nila ni Manilyn Reynes, Sheryl Cruz, ug Tina Paner.

Dugang cast mao sila si  Keempee de Leon, Sef Cadayona Zymic Jaranilla ug award-winning ug veteran actress Gloria Romero.

Ang “Meant To Be” usab maoy unang project ni Mika dela Cruz, kinsa bag-ohay lang nipirma og kontrata isip Kapuso star. Ang maong serye maghisgot sa mga panikaysikay sa NBSB (no boyfriend since birth) nga si Billie (Barbie) sa natad sa gugma ug career kauban ang iyang upat nga leading men.

Suma pa nga dili pa masayran kinsa gyud maoy ikadayon ni Billie dinhi niining maong serye, sanglit magdepende kini sa reaksyon sa publiko kinsa sa upat nga mga lalaki ang ilang mauyonan.

Thanksgiving performance sa Siddhartha

Mapasigarbuhong gipahibalo sa mga nagpaluyo sa Siddhartha The Musical nga atol sa ilang ika 100 nga pagpasundayag niini karong tuiga, libre kini nilang idalit sa publiko .

Mao kini ang ilang pamaagi sa ilang pagpasalamat  sa mga Sugbuanon nga wala’y puas nga nisuporta kanila sukad nahulma ang maong play.

Kini mahitabo karong December 8-12 gikan sa alas dos sa hapon hangtud sa alas syete sa gabii sa SM City Cebu Cinema 1.

Kahinumduman nga sukad sa pagkahimugso sa maong play niadtong 2007 ubay-ubay na sab kini og mga lugar nga naabtan. Kini sama sa  Amerika, Singapore, Malaysia, Hong Kong, Macau, New Zealand ug Japan.

Giisip ang maong musical play isip homegrown gem sa Cebu gumikan  kay puros  Cebuano talents ang nalakip sa cast niini. Ang maong play gibase sa biography ni Sakyamuni Buddha ubos sa paggama niini kaniadto sa nabantog nga si Master Hsing Yun.

Karong tuiga nagmarka sa ika- 10 nga anibersaryo sa gitawag nga Cebu's longest running original musical.

Kini gi-produce sa Fo Guang Shan Philippines ug sa Buddha's Light International Association Philippines.

Si Sarah Mae Enclona–Henderson ang direktor sa maong musical play ug gipasigarbo niini nga layo na kaayo ang naabtan sa ilang grupo.

Una na nga gibutyag ni Henderson   nga napuno sa bug-at nga mga eksena inubanan sa hugyaw nga stage production ang Siddhartha :The Musical

Pang-international  standard ang maong musical play busa nakatabang  kini sa pagsidlak sa mga Sugbuanon sa natad sa pag-arte sa entablado.

Kasagaran sa mga sakop sa cast niini ang busy sa tagsa-tagsa nila ka mga trabaho apan mogahin gyud sila og oras sa maong musical play gumikan kay nahimo na kini nga tipik sa ilang kinahuhi sulod sa taas nga katuigan.

Ang ilado nga Cebuano performer nga si Benjie Layos midala isip Budhha.Tipik usab sa Siddhartha: The Musical ang   performer nga si Cerj Michel midala isip King Suddhodana.  (BANAT NEWS)