Marcial mopakanaog na karon og desisyon

CEBU, Philippines — Gipaabot karon ang hukom ni PBA officer-in-charge Willie Marcial   kun unsa ang silot nga iyang ipahamtang sa  malapason nga mga magduduwa atol sa duha ka insidente diin adunay nahitabong lamok-lamok.

Ang mga players nga  ipatawag ni Marcial sa iyang opisina karong adlawa mao sila si Rain or Shine Elasto Painters Raymond Almazan, Kia Picanto forward Eric Camson ug reserve guard sa NLEX Road Warriors nga si Michael Miranda.

Si Marcial wala makauyon sa nahitabong sinukmagay nila ni Almazan ug Camson niadtong Sabado didto sa Cuneta Astrodome. Ang duha nagsinukliay og mga kumo sa wala pa mauwang sa mga reperi ug ilang mga teammates dihang nagkainitay sila atol sa usa ka play.

Si Marcial, kinsa maoy mibarog nga PBA commissioner hulip ni Chito Narvasa, miingon  kinahanglan nga adunay silot  aron   dili  na masubli ang gibuhat sa duha ug aron  sab  mapanalipdan ang intigridad sa PBA.

Sa laing bahin, si Marcial wala sab kauyon sa gibuhat ni Miranda nga mipatid ni San Miguel Beermen star guard Chris Ross atol sa usa ka play niadtong Biyernes.

Si Marcial midugang nga dili niya ipatawag si NLEX coach Yeng Guiao ug Ross, apan hinabion niya ang duha aron matino ang nahitabong tinubagay sa duha  nga nagbinayloay og sakit nga mga pulong sulod sa korte.