Nadera moasdang na sa Malaysia
CEBU, Philippines — Molarga na karong adlawa paingon sa Malaysia ang Sugboanang chess player nga si Laila Camel Nadera alang sa Association of Southeast Asian Nations (ASEAN) Age-Group Chess Championships nga gikatakda karong Nobiyembre 26 hangtod sa Disyembre 3 didto sa Grand Darulmakmur Hotel sa Kuanta, Malaysia.
Ang 18-anyos nga si Nadera, ang kinamaguwangan sa duha ka anak nilang Camelo ‘Tata’ ug Lorena Nadera, mopakita’g aksiyon ubos sa girls 18-under division.
Si Nadera, tinun-an sa University of San Carlos (USC), ubanan sa laing tulo ka Carolinians nga sila si Jave Mareck Peteros, Regina Catherine Quiñanola ug Krisen Yochabel Marie Sanchez.
Nakaangkon sila og katungod nga modala sa bandila sa Pilipinas sa ASEAN isip kabahin sa ilang ganti human naapil sa Top 3 sa ilang dibisyon atol sa 2017 National Age-Group Chess Championships (NACC) Grand Finals niadtong Mayo diha sa Robinsons Galleria Cebu.
Si Nadera nalandig sa ikaduhang dapit sa girls 18-under sa iyang 8.0 puntos nga gidominar ni Women’s FIDE Master Allaney Jia Doroy sa National University (NU) nga mirehistro og 9.5 points.
Miposte sab og 8.0 puntos si Peteros aron sa pagpahiluna sa ikaduhang dapit sa boys 14-under, samtang mipasilong sab sa ikaduha nga dapit si Quiñanola sa girls 14-under sa iyang 10.5 puntos ug si Sanchez mikapyot sa ikatulo sa girls 12-under nga mirehistro og 10.0 points.
Sangkaon nila ang mga banggiitang chess players gikan sa Brunei, Myanmar, Cambodia, Indonesia, Laos, Philippines, Singapore, Thailand, Vietnam ug host country nga Malaysia. (BANAT NEWS)
- Latest