Warriors daog gihapon
CEBU, Philippines — Si Kevin Durant mirehistro og 21 puntos uban ang walo ka rebounds, unom ka assists ug tulo ka blocks alang sa Golden State Warriors nga bisan tuod nagkaproblema sa ilang mga tirada nakamaneho gihapon pagpabugnaw sa Miami Heat, 97-80 sa NBA kagahapon didto sa Oracle Arena sa Oakland, California.
Mitampo si Draymond Green og 18 puntos, lakip na ang upat ka tres ug siyam ka rebounds alang sa defending NBA champions nga miinat sa ilang rekord ngadto sa 8-3.
Dili hinuon kaayo hait ang opensa sa Warriors hinungdan nga wala maabot og 100 ang ilang iskor sa labing unang higayon karon nga season. Timaan niini, si Stephen Curry nalimitahan ngadto lamang sa 16 puntos ug 13 puntos lang si Klay Thompson.
Apan ang mabugnaw nilang mga kamot wala nahimong babag sa ilang dalan ngadto sa kalampusan. Gani, kontrolado sa Warriors ang duwa gikan sa pagsugod dayon na ngadto sa pagposte og 50-37 nga labaw sa halftime. Wala na nila hatagi pa og higayon ang Heat nga makaginhawa sukad niadto.
Si James Johnson mitali og 21 puntos, samtang si Goran Dragic midugang og 19 puntos alang sa Heat nga nasugamak ngadto sa ikalima nilang pilde sud sa siyam ka duwa.
Sa lain pang mga aksiyon, si Kyrie Irving mipatuasik og 35 puntos ug si Jayson Tatum midugang og 21 puntos sa dihang midaog ang Boston Celtics batok sa Atlanta Hawks, 110-107, samtang si D’Angelo Russell mibubo og 13 sa iyang 23 puntos sa katapusang kuwarter aron pag-aswat sa Brooklyn Nets ngadto sa 98-92 nga kadaogan batok sa Phoenix Suns.
Human mahagba sa nag-una nilang duha ka duwa, ang Celtics miinat sa nagkadina nilang daog ngadto sa siyam aron pag-angkon sa labing nindot nga 9-2 record sa NBA karon nga season, samtang ang Nets mikutlo sa ikaupat pa lamang nilang daog sa 10 ka duwa. (BANAT NEWS)
- Latest
