Mayweather pildihon ni mcgregor kun dunay rematch
CEBU, Philippines — Masaligon si UFC star Conor McGregor nga iya na nga mapilde si Floyd Mayweather Jr. kun ugaling adunay mahitabo nga ‘rematch’ tali nilang duha.
Atol sa miagi nilang engkuwentro niadtong Agosto didto sa T-Mobile Arena sa Las Vegas, si Mayweather midaog ni McGregor pinaagi sa TKO sa ika-10 nga hugna sa usa sa labing dako nga away sa kasaysayan sa boksing.
Matud pa ni McGregor nga saludo siya sa abilidad ni Mayweather, apan wala siya’y bisan gamay nga pagduda sa iyang huna-huna nga siya maoy modaog kun ugaling mag-abot og usab ang ilang dalan.
“He (Mayweather) was a tactical genius in there. He changed his gameplan three times and that is the sign of a true champion,” matud pa sa 29-anyos nga si McGregor.
Gitahod hinuon ni McGregor ang kasamtangang estado ni Mayweather nga usa na ka retirado ug dili na siya mohagit pa niini og ‘rematch’.
Adto karon mapunting ang atensiyon ni McGregor sa sunod niyang pagdepensa sa iyang UFC lightweight title. (BANATNEWS)
- Latest