MMA amateur fight card karong Agosto 26
CEBU, Philippines - Laing puno sa aksiyon nga mixed martial arts ug kickboxing fight card ang ipahigayon sa Yaw-Yan Ardigma Cebu Martial Arts sa dihang ang ikapitong edisyon sa ilang Cebu Extreme Fight League nga giulohan og “Respect” mosikad karong Agosto 26 diha sa Yaw-Yan Headquarters sa dalan Sanciangko siyudad sa Sugbo.
Lahi sa unang mga edisyon sa torneyo, si Yaw-Yan ArDigma Cebu founder Master Benigno ‘Ekin’ R. Caniga nagkanayon nga wala na’y mga professional fighters nga mosalmot kay mopokus sila sa pagbaid sa mga amateur fighters.
“We had professional fights in the previous CEFL cards, but we will now focus on the up and coming amateur fighters because we want it to be a developmental league,” matud pa ni Master Ekin. “CEFL will be the starting ground for these warriors for the bigger stage and that is when they turn pro.”
Sa main event, magharong ang grappler nga si Cipoz ‘Aquaman’ Guadez sa CITI BJJ ug striker Tonix ‘Silent Killer’ Borres sa JB Dream Fitness Gym ubos sa bantamweight division.
Sa pagka karon, gipanday pa ang kinatibuk-an nga fight card, apan si Master Ekin mibutyag nga adunay siyam ka MMA bouts ug tulo ka kickboxing matches ang maong kalihukan. Ang mga tiket mapalit sa tag-P200 sa free seats ug P500 sa VIP/ Cage side. Sa dugang mga pangutana, mahimong motawag sa 09436568900. (BANAT NEWS)
- Latest
