2 UC players moapilsa Asian Tour ni Curry
CEBU, Philippines - Duha ka high school varsity sa University of Cebu (UC) Junior Webmasters uban ang ilang head coach ang makapahimulos sa talagsaon nga kahigayonan nga mahimamat ang usa sa labing maayo ug tinamod nga basketbolista karon sa kalibotan.
Sa ilang pagluwan sa abyon karong kaadlawon alang sa labing una niyang biyahe gawas sa nasud, sila si John Bryl Cuyos ug Virlou Orquez ug ang ilang coach nga si Jover ‘Brad’ Samonte gibati nang daan og tumang kahinam nga mahimamat si Golden State Warriors superstar Stephen Curry.
Kabahin sa premyo sa ilang pagdominar sa Under Armour 3x3 U18 basketball national tournament niadtong Abril didto sa Taguig City, ang Under Armour Philippines mipadala nilang Cuyos, Orquez ug Samonte sa Seoul aron mosalmot sa South Korea leg sa “2017 Stephen Curry Asia Tour Powered by Under Armour” nga sugdan ugmang adlawa.
Doble nga pagmaya ang nagpaabot sa mga representante sa UC gumikan kay ang two-time NBA MVP kuyogan man sa iyang igsuon nga si Seth Curry nga sakop sa Dallas Mavericks sa labing una niyang pagbisita sa Korea.
Si Curry nga maoy labing unang unanimous MVP sa liga human gitimonan ang Warriors ngadto sa makasaysayanong 73 ka daog niadtong 2015-2016 NBA season, bag-o pang mipirma og lima ka tuig nga kontrata nga mibalor og $201 million uban sa Warriors. (BANAT NEWS)
- Latest