1st PSC Central Visayas tablenetfest gitakda

CEBU, Philippines - Ang Philippine Sports Commission (PSC) pinaagi sa inisyatiba ni Commissioner Ramon Fernandez ug ang Philippine Sports Institute (PSI)-Visayas  mopahigayon sa labing unang PSC Central Visayas Table Tennis Invitational Tournament diha sa cinema lobby sa SM City-Consolacion karong Hulyo 29-30.

Ang duha ka adlaw nga torneyo kabahin sa grassroots development program sa PSC inabagan sa PSI uban ang tinguha nga makakaplag ug makahashas og mga talento ug dayon hulmaon sila nga mga dekalibreng atleta nga mahimong ibangga sa nasud sa internasyonal nga mga kompetisyon.

Mosalmot sa aksiyon ang mga atleta gikan sa nagkadaiyang LGUs (local government units) nga sakop sa Central Visayas region.

Mga kategoriya nga kumbatihan mao ang 12-under ug 17-under sa boys ug girls ug ang team open event.

Gawas sa mga tropeyo ug medalya, ganting salapi ang ihatag ngadto sa nag-unang tulo ka mga mananaog.

Nagsugod na karon ang rehistrasyon. Giabisohan kadtong mga gusto moapil nga   magpalista og sayo gumikan kay limitado ang slots. Ang katapusang adlaw pagsumiter sa mga entrante karong Hulyo 27.

Alang sa dugang mga detalye, mahimong motawag nilang event organizers Engr. Junji Berdon (0933-336-9296) ug Bong Agravante (0928-7263010) o dili ba ni PSC-7 coordinator Audie Marte (254-7291). (BANAT NEWS)