McGregor mitaak na sa Las Vegas

CEBU, Philippines - Mitaak na sa Las Vegas, Nevada si Conor McGregor alang sa katapusang bahin sa iyang training camp agi’g pangandam sa giatngan nilang away ni Floyd Mayweather Jr.

Ang two-division UFC champion mipahigayon sa unang bahin sa iyang training didto sa Dublin, Ireland, ang yuta niyang natawhan, apan karon magpabilin na sa gibansagan nga Sin City hangtod sa adlaw sa away.

Si McGregor gikatakda nga makigbinukbukay ni Mayweather sa gipaabot nga labing dako nga away sa kasaysayan karong Agosto 26 didto sa T-Mobile Arena sa Las Vegas.

Wala makaensayo si McGregor sa miaging semana gumikan sa ilang world tour ni Mayweather diin sila naglinabayay og insulto ug mahait nga mga pulong didto sa Toronto, Los Angeles, New York ug London aron i-promote ang umaabot nilang sangka.

Kagahapong adlawa, gipasulod sa 29-anyos nga si McGregor si Paulie Malignaggi sa ilang training camp.

Si Malignaggi, kanhi two-time world boxing champion, maoy labing uwahi nga ika-sparring ni McGregor nga naglaraw nga pakuratan ang kalibotan sa  boksing pinaagi sa pagpatilaw ni Mayweather sa labing una niining pilde. (BANAT NEWS)