Hubog nanunggab sa iyang mga katagay

CEBU, Philippines - Hubog nanunggab sa iyang mga katagay atol sa usa ka birthday party sa Sitio Saling-it sa Brgy. Bongdo Proper sa Lungsod sa Borbon.

Giila ang suspetsado nga si Mario Prias samtang ang duha ka mga biktima mao sila si Renilo Arizo ug Rolando Lagnason, pulos mga residente sa Sitio Saling-it sa nahisgutang barangay.

Ang imbestigador sa maong kaso nga si PO2 Raffe Tejares niingon sa Banat News nga nag-inom ang tulo sa usa ka birthday party sa kaliwat sa mga biktima.

Gumikan sa kahubog, giingong kalit nga gibunalan sa suspetsado gamit ang botelya sa ilimnong makahubog ang nawong sa natulog nga si Arizo kinsa nahubog na sab. Pagkahuman, giduslak niini ang binuak nga botelya ngadto sa walang dughan sa naglingkod nga si Lagnason.

Matud ni PO2 Tejares nga sa iyang inisyal nga imbestigasyon, nasuta nga walay giawayan ang tulo ug nakugang na lang ang mga tawo dihang kalit kining nanghasi.

Gibutyag sa polis nga daling gidala sa tambalanan ang mga biktima diin nabun-og ang nawong, nihubag ang suwang ug nagisi ang dapit sa mata ni Arizo samtang nakaangkon og samad dinunggaban si Lagnason.

Nisibat si Prias human sa hitabo ug nadakpan kini sa kapolisan sa gikawot nga anapog sa lugar.

Nasuta sa kapolisan nga kulatado sab diay ni Prias ang iyang asawa ug targeton og kutsilyo ang iyang anak nga babaye sa panahon nga mahubog kini hinungdan nga nibuwag na og puyo ang iyang anak.

"Wala man siyay record sa drugs. Maldito kuno ni kon makainom pero matud pa sa iyang asawa nga kon di kuno hubog maayo ra man kuno ning tawo" matud pa ni PO2 Tejares.

Kasong frustrated homicide ang gikatakdang atubangon sa suspetsado. (BANAT NEWS)