Import sa TNT kaduha-duhaan makaduwa
CEBU, Philippines - Daw mihilis ang kompiyansa sa TNT KaTropa tungod kay kaduha-duhaan pa nga makaduwa ang ilang import sa krusyal nga Game-4 sa ilang “best-of-five” semifinal series sa 2017 PBA Commissioner’s Cup karong gabii didto sa Cuneta Astrodome.
Ang 6-foot-9 nga si Josh Smith nga maoy sinaligan sa opensa ug depensa sa TNT wala makatiwas og duwa sa Game-3 niadtong Huwebes nga usa sa mga rason nganong napilde sila ngadto sa Barangay Ginebra Kings, 101-125.
Sa pagka karon, ang TNT mao pa ang naggunit sa pabor sa series, 2-1.
Si Smith nagtakiang nga nigawas sa playing court human maaksidente atol sa usa ka play.
Si TNT coach Nash Racela miingon nga wala pa siya masayod kun unsa ka seryoso ang injury ni Smith.
Sayod hinuon si Racela nga mabutang sila sa lisud nga sitwasyon kun modaog pag-usab ang Ginebra karon og mapugos ang serye sa usa ka 'do-or-die' game tungod kay seguradong wala na kanila ang momentum.
Ang higanteng si Smith maoy gitan-aw nga yawi sa kalampusan sa TNT karon nga conference ug si Racela mag-ampo lang nga unta dili kaayo seryoso ang injury sa iyang American import.
Kun makaduwa si Smith karon, segurado nga dili kini niya malmalon og maayo sa TNT aron dili masamotan ang angol niini. (BANAT NEWS)
- Latest
