1994 Bulldogs 3-0 na
CEBU, Philippines - Mikadlit og 17 puntos si Sigmund Cabrera sa dihang gilatos sa 1994 Bulldogs ang 1986 Waveriders, 72-51 aron pagpabilin niining wa’y pilde sa University of San Carlos-North Alumni Basketball Conference (USC-NABC) Summer League 2 diha sa USC North Campus gym.
Si Joseph Lu midugang og 12 puntos alang sa Bulldogs nga padayong naghari sa Division 1 bitbit ang 3-0 nga baraha
Sa laing mga duwa sa Division 1, si Fabio Bartolinao mitali og 21 puntos ug si Jonathan Diaz midugang og 17 puntos sa dihang gilat-an sa 1982 Classic Basketball ang 1987 Bro, 61-47, samtang sila si Jade Ylanan ug Bong Eleazar dunay 12 puntos sa dihang gibihag sa 1993 Dragons ang 1984 Knights, 73-53 alang sa ikaduha nilang sunod-sunod nga daog.
Sa Division 2, ang 2000 Millennium Bugs mipayaka sa 1996 Chubbies, 37-34, alang sa ikaduha nilang daog sa tulo ka duwa, samtang sa Division 3, si Robert Codilla mipupo og 16 puntos, sa 2007 Waybus nga mipukan 2003 Stallions, 48-38 alang sa ikaduha nilang sagunson nga daog. (BANAT NEWS)
- Latest