Warriors mas gipaboran sa mga sugarol

CEBU, Philippines - Migawas nga 'underdog' ang Cleveland Cavaliers batok sa Golden State Warriors kun ang mga betting station sa Las Vegas ang basehan.

Bisan pa og napilde sa Cavs nga gipangulohan ni LeBron James ang Warriors sa miagi nilang engkuwentro niadtong miaging season, ang Warriors mas gipaboran gihapon nga mudaog human usab nila harusa ang playoffs sa wala pa makuha ang luna sa finals.

Misamot usab kakusog ang Warriors kun itandi nimo sa miaging season tungod kay anaa kanila ang superstar nga si Kevin Durant kinsa migawas nga usa sa ilang mga premyadong scorer uban nila ni Stephen Curry ug Klay Thompson.

Hinuon inay matarug, ang usa sa pambato sa Cavs nga si Kevin Love nahagit og mas ganado nga muduwa aron ipakita nga seryoso sila nga makahimo og back-to-back championship.

"The whole underdog thing is funny to me, because yeah, at the end of the day we are defending our title," matud pa ni Love sa Associated Press.

Si Cavs coach Tyronn Lue mihangop usab sa pamahayag ni Warriors forward Draymond Green kinsa miingon nga gidamgo niya nga makasangka pag-usab ang Cavs bisan pa og wala pa sugdi ang playoffs.

Si Lue mibilib sa kaisug ug kadasig ni Green nga ikasangka sila pag-usab ug misaad siya nga suklian kini og usa ka nindot nga finals series. - LPM (BANAT NEWS)