Cebu Marathon sunod tuig gipanindot

CEBU, Philippines - Mas kulbahinam ug mas lisud nga hagit ang mahitabo sa sunod nga Cebu Marathon gumikan kay gawas sa bag-o niining porma, duna sab kini bag-ong binyu ug rota alang sa 2017 niining edisyon karong Enero 8.

Human gipahigayon didto sa Cebu Asiatown IT Park sud sa pipila ka tuig, ang sunod nga aksiyon mahitabo na sa Cebu Business Park hinungdan nga dili na kini magsubay sa South Road Properties.

Gumikan niini, ang lumba nga giorganisa sa Cebu Executive Runners Club mahimo nang “Tri-City” kay ang rota maglangkob man sa kadalanan sa dakbayan sa Sugbo , Mandaue ug Lapu-Lapu.

Mao kini ang labing unang higayon nga ang karera maabot sa Marcelo Fernan Bridge alang sa mga entrante sa 21K ug full marathon.

Gikan sa 5K lamang, duna na sa’y 10K category ning tuiga.

Kadtong gusto moapil mahimo nang magparehistro online pinaagi sa www.cebumarathon.net. Ngadto sa mga wa’y credit cards, si John Pages sa CERC nagkanayon nga dunay on-site registration nga sugdan karong Oktubre 10 diha sa Active Zone sa Ayala Center Cebu. (BANAT NEWS)