San Miguel, Ginebra mag-unhanay sa Game 1

CEBU, Philippines - Magkurus ang dalan sa managsuong koponan nga San Miguel Beermen ug Barangay Ginebra diin ilogan nila ang krusyal nga daog sa Game-1 sa ilang 'best-of-five' semifinals series sa PBA Governors' Cup karong gabii didto sa Smart Araneta Coliseum.

Si Ginebra coach Tim Cone nagkanayon nga takna na aron makita kun andam na ba sila nga mokampiyon pagbalik pinaagi sa pagbuntog sa defending champion nga San Miguel.

Ang Ginebra miabante dayun sa semis human sa ilang kulbahinam nga kadaugan batok sa Alaska Aces, samtang ang San Miguel maoy unang koponan nga mitungtong sa Final Four dihang ilang gipapauli og sayo ang NLEX Road Warriors.

Ang multi-titled coach miingon nga bisan pa og ang TNT KaTropa ang mitapos nga No.1 sa elimination, ang SMB gihapon iyang gikonsiderar nga labing kusug nga title contender rasun nga ihatag nila ang tanan aron makahimo og usa ka dakung 'upset' nga kadaugan sa maong serye.

“No offense to TNT which topped the elims, I think SMB is still the team to beat in the semis. With June Mar (Fajardo) and all the weapons around him, it’s not a stretch to say they’re really tough. Fajardo is tough to handle especially without Greg (Slaughter),” matud pa ni Cone sa The Philippine STAR.

Gawas ni Fajardo, laing mga tutukan sa depensa sa Gin Kings mao ang bangis nga import nga si Elijah Millsap uban ang mga veteran locals nga sila si Arwind Santos, Marcio Lassiter ug Alex Cabagnot.Tahasan nga mupugong ni Millsap ang import sa Ginebra nga si Justin Brownlee.  (LPM)(BANAT NEWS)