Mahindra natagak dayon

CEBU, Philippines - Natagak dayon ang Mahindra Enforcer sa  labing una nilang PBA playoff appearance  dihang gilubong sila sa Meralco Bolts, 82-105 sa PBA Governors’ Cup kagahapon didto sa Ynares Center.

Ang Mahindra kusog  kaayo pagsugod  sa conference diin adunay higayon nga mitungtong pa sila sa unang dapit sa standing.

Apan sa mga hinapos nga bahin sa elimination,    minaog sila sa ikalimang dapit  hinungdan nga gikasangka nila ang  twice-to-beat nga Meralco.

Si Allen Durham maoy miguba sa depensa sa Enforcer aron morehistro og 24 puntos ug 16 ka rebounds, samtang ang rookie nga si Chris Newsome mitampo usab og 19 puntos.

Ang Mahindra milabaw og 15 puntos, apan dali kining napapas sa Meralco  sa final period.

Ang Meralco magpaabot na lang sa modaog tali sa TNT KaTropa ug Phoenix Fuel Masters alang sa  semifinals.

Nangulo sa Mahindra mao si James White sa iyang 20 puntos ug 10 ka rebounds. Wala makaduwa sa labing unang playoff game sa Enforcer  si  playing coach Manny Pacquiao kay nangandam kini sa iyang sangka batok ni Jessie Vargas karong Nobiyembre 5 didto sa Las Vegas. (BANAT NEWS)