Katapusang paglaum sa Star, Blackwater
CEBU, Philippines - Kinahanglan nga makuha sa Star Hotshots ug Blackwater Elite ang krusyal nga daog aron aduna pa sila’y paglaum nga moabante sa playoffs sa PBA Governors’ Cup.
Ang Hotshots (1-5) ug Elite (1-6) nangiwit sa standing ug kuyaw sila nga mataktak kun mapilde pa sila karon.
Ang duha ka koponan kinahanglan nga mopagawas sa tanan nilang hinagiban tungod kay nagpaabot kanila ang lisud nga sangka karong adlawa didto sa Smart Araneta Coliseum.
Ang Star makigharong sa crowd-darling Barangay Ginebra sa alas-6:45 sa gabii, human sa duwa tali sa Blackwater ug Alaska Aces sa alas-4:30 sa hapon.
Gikan sa ilang estado kaniadto isip usa ka title contender, ang Star gikabalak-an sa ilang mga fans nga dili makasulod sa playoffs.
Makita usab karon kun hingpit ba nga nakarekober ang Star human sa katapusan nilang duwa niadtong miaging semana didto sa Davao diin gipakauwawan sila sa Alaska, 85-69. (BANAT PALARO)
- Latest