Baby Jaguars nimasaker sa Wildkittens
CEBU, Philippines - Gimasaker sa University of San Jose-Recoletos Baby Jaguars ang Cebu Institute of Technology-University Wildkittens, 100-50 sa ilang duwa kagahapon sa 16th Cebu Schools Athletic Foundation, Inc. men’s basketball tournament didto sa Cebu Coliseum.
Gidominar sa Baby Jaguars ang duwa gikan sa pagsugod dayon na ngadto sa pagkitkit sa Wildkittens alang sa ikaduha nilang daog sa upat ka duwa.
Sila si Kirk Gonzaga ug Van Tindoy mitali og 13 puntos matag usa, samtang sila si Theo Ranara ug Dave Ando nagkumboya’g 23 puntos alang sa Baby Jaguars nga wala na molingi pa human miposte og 44-28 nga bentaha sa halftime.
Pabiling nanginit ang Baby Jaguars ubos sa liderato ni Gonzaga aron pag-inat sa ilang labaw ngadto sa 32 puntos 73-41 sa nahabilin nga usa ka minuto sa ikatulong kuwarter.
Bisan naglabaw og milya, ang Baby Jaguars padayong miratsada dayon na ngadto sa paglubong sa Wildkittens og makapakurat nga 50 puntos.
Sila si Ivan Ares ug Riley Hapin mikadlit og tinigum nga 32 puntos, apan miuli silang huyhoy ang abaga gumikan kay ang Wildkittens pabiling bokya human sa upat ka duwa. (BANAT PALARO)
- Latest
