All-Stars, Tech Mighties, Dragons pabiling wa’y pilde sa E-League
CEBU, Philippines - Mitali og 13 puntos ug 13 sab ka rebounds si Ryan Veloso sa dihang gibuntog sa Teleperformance All-Stars ang Accenture Sharks, 73-68 aron pagpabiling wa’y pilde sa 12th CSCC E-League men’s basketball tournament niadtong Domingo didto sa City Sports Club- Cebu gym.
Sila si James Lester ug Kevin Clark Navaja nagkumboya’g 23 puntos alang sa All-Stars nga mao na lang karon ang wa’y pildeng koponan ubos sa Elite Classic bitbit ang 4-0 nga baraha.
Ang All-Stars alkansi og singko puntos human sa unang kuwarter, 14-19, apan nakabawi ra dayon gamit ang 44-35 run.
Sila si Marloni Gonzales ug Ryan Edward Llanos parehong miiskor og 16 puntos alang sa Sharks nga natagak ngadto sa 3-3.
Sa laing Elite action, si Esrom Cuizon mibahog og 14 puntos ug si Robert Gilo midugang og 13 puntos ug 12 ka rebounds alang sa ePerformax Reds nga mipakaging sa Telstra Boomerangs, 77-64 aron pag-inat sa ilang rekord ngadto sa 4-1.
Sa Evo League, si King Luigi Olbes mikadlit og 12 puntos sa Tech Mahindra Tech Mighties nga milubong sa Atos Falcons, 63-40, alang sa ikaunom nga sagunson nilang daog, samtang si Nino Belande miayag og 25 puntos ug 23 ka rebounds alang sa Supportsave Dragons nga nimasaker sa Dyninno Raptors, 73-60 alang sa ikalima niining sunod-sunod nga daog. (BANAT NEWS)
- Latest
