CEPCA miplastada og pipila ka torneyo

CEBU, Philippines - Nagplansa na ang Cebu Executives and Professionals Chess og pipila ka mga torneyo  nga kabahin sa daghan niining programa sa nahabilin nga bahin karon tuiga.

Mao kini ang nauyonan sa grupo atol sa ilang Board meeting nga gipasiugdahan ni two-time CEPCA President Engr. Jerry Maratas sa miaging adlaw didto sa Choobi-Choobi restaurant sa Robinsons Galleria Cebu.

Gawas sa regular nilang binulan nga torneyo, si CEPCA sports committee chairman Jun Olis  nagkanayon nga  ila  na  sab gihan-ay ang ilang 26th Anniversary Chess Open nga gikatakda karon Oktubre 15-16.

Ang maong 9-round Swiss system competition motanyag og kinatibuk-ang ganti nga P50,000.

Karong Nobiyembre, ang club mopahigayon og  Cebu Kiddies Chess Festival nga kabahin sa ilang programa alang sa mga bata nga naglaraw mabaid og maayo ang ilang abilidad.

Tak-upon sa CEPCA ang ilang tuig pinaagi sa grandfinals sa binulan nilang torneyo nga gibansagan sab og “Battle of Champions” karong Disyembre.

Ipahigayon kini dungan sa tradisyonal nilang Christmas party ug ingon man pormal nga paghurar sa mga bag-ong miyembro sa maong kahugpungan. (BANAT NEWS)