Nietes, Magsayo, Villanueva mitaak na didto sa Amerika
CEBU, Philippines - Mitaak na og balik didto sa Amerika sila si two-division world champion Donnie ‘Ahas’ Nietes, WBO International featherweight champion Mark ‘Magnifico’ Magsayo ug WBO Asia-Pacific bantamweight champion ‘King’ Arthur Villanueva aron mopahigayon og laing hugna sa subsob nga pagbansay-bansay alang sa umaabot nilang mga sangka.
Ang tulo ka bitoon sa ALA Boxing Gym mag-ensayo didto sa Wild Card Gym ni Hall of Fame trainer Freddie Roach sa Los Angeles aron pagseguro nga hitsas sila sa tanang armas sa ila unyang pagsalida sa ikatulong Pinoy Pride event sa ALA Promotions ug ABS-CBN Sports didto sa Estados Unidos sunod bulan.
Giulohan og “Pinoy Pride 39: Philippines vs. Mexico”, ang eksplosibong pinaksitay gikatakda karong Septiyembre 24 didto sa StubHub Center sa Carson, California.
Si Nietes mobida sa main event diin siya moaway sa labing unang higayon isip flyweight batok ni kanhi world champion Edgar Sosa.
Sa iyang pagkatkat sa mas bug-at nga timbang, wa’y pamilok si Nietes nga mideklara nga gusto niyang sangkaon ang labing tang-an nga boksidor sa flyweight division diin nag-una sa iyang listahan mao si unified WBO/WBA champion Juan Francisco Estrada.
Sa iyang bahin, si Magsayo moaway batok sa wala pa hisayring kontra, samtang si Villanueva makigharong ni Juan Jimenez sa usa ka dumot nga ‘rematch’.
Sa miagi nilang engkuwentro niadtong Mayo 23 didto sa Bacolod City, si Villanueva nakabangon human malukapa sa ikaduhang hugna dayon na ngadto sa pag-KO ni Jimenez sa ikaupat nga hugna. Niadtong tungora, ang panagbangga sa ulo ug dili lehitimong kumo ni Villanueva nakatumba ni Jimenez. Nasagmuyo ang kampo ni Jimenez sa pag-undang ni reperi Dan Nietes sa away dayong protesta nga gidawat sab dayon sa habig sa ALA pinaagi sa paghatag og rematch. (BANAT NEWS)
- Latest
