Seminar sa mga reperi sa CESAFI gitakda
CEBU, Philippines - Ang Cebu Schools Athletic Foundation, Inc. (CESAFI) mopahigayon og seminar sa mga reperi karong Biyernes (Hulyo 29) ug Sabado (Hulyo 30) diha sa Cebu Eastern College (CEC) gym.
Ang duha ka adlaw nga seminar sugdan sa alas-8 sa buntag hangtod sa alas-4 sa hapon.
Mopahigayon sa seminar mao si international referee ug kanhi PBA supervisor Romy Guevarra.
Moabag niya sa seminar ang duha ka beteranong reperi nga sila si Ed Aguelo ug 1997 ‘best referee’ Edwin Dejacto Sr. Ang duha pulos sab mga national referees.
Si CESAFI commissioner Felix Tiukinhoy Jr. ug iyang deputy nga si Danny Duran motambong sab sa maong mahinungdanong kalihukan.
Tumong ug tuyo sa seminar mao ang paghashas ug pagpalambo pa sa abilidad sa mga reperi.
Matud pa ni Duran ang pag-anhi ni Guevarra daku kaayo og matabang sa mga CESAFI referees.
Human sa seminar, adunay examination nga pagahimuon ug ang makapasar adunay tsansa nga maka-officiate sa umaabot nga 2016 CESAFI season nga gikatakdang buksan sa Agosto 6 diha sa Cebu Coliseum.
Ang mapiling mga reperi pagatawgon og “CESAFI pool of referees”. (BANAT NEWS)
- Latest