Gilas Pilipinas cadet hari sa SEABA Cup

CEBU, Philippines - Gipamatud-an sa Gilas Pilipinas cadet  nga sila ang labing bantugan nga koponan sa basketbol  sa Southeast Asia human ilang gilubong ang host Thailand, 97-80 aron pagsakmit sa SEABA Cup title kagabii didto sa Bangkok, Thailand.

Human sa ilang sikit  kaayong kadaugan sa eliminasyon batok gihapon sa Thailand, 66-65, ang Gilas nga gipangulohan ni PBA rookie Troy Rosario mipakita sa ilang   kadominante diin wala na nila hatagi og kahigayonan ang kontra nga makasikit sa duwa.

Si Rosario mipabuto og 17 puntos alang sa Gilas nga migamit sa balanse nilang opensa batok sa Thailand. Si Jio Jalalon miiskor og 16 puntos, samtang sila si Mac Belo, Mike Tolomia ug Almond Vosotros mitampo og 14, 12 ug 11 puntos matag usa. Ang Cebuano nga si RR Pogoy miamot usab og 10 puntos.

Gikan sa kuwatro puntos nga labaw sa halftime, ang Gilas miratsada dayon sa second half ug hinay-hinay nilang gibiyaan ang Thailand, 63-52 sa katapusang singko minutos sa third period.

Ang Gilas mitala sa  labing daku nilang labaw nga 15 puntos, 87-72  sa katapusang 2:36 sa duwa human sa scoring rally nila ni Belo, Tolomia ug Pogoy. (BANAT PALARO)