Bahin sa liderato tuyo sa Phinma, Highlands

CEBU, Philippines - Ang Phinma/Southwestern University Cobras (SWU) ug Highlands Corned Beef/University of Cebu (UC) Webmasters naglaraw nga makaangkon og bahin sa liderato sa ilang duwa batok sa managlahing kontra sa 8th Cebu Schools Athletic Foundation, Inc. (CESAFI) Partner’s Cup karong adlawa diha sa Cebu Coliseum.

Ang SWU ug UC nag-agi og managlahing dalan sa wala pa subhi ang ilang kampanya og daog.

Ang Cobras nakabangon human maalkansi og 16 puntos sa katapusang kuwarter dayon na ngadto sa pagpakurat sa Mighty Sports/University of San Jose-Recoletos  Jaguars, 71-68, samtang ang Webmasters dominante gikan     sa   pagsugod    aron paglampurnas sa Tyron Properties/University of Southern Philippines Foundation Panthers sa iskor nga 91-72.

Sa ilang pakighamag batok sa tagsa-tagsa nila ka kaatbang,  ang  Cobras ug Webmasters nagtinguha nga makigsawo sa liderato uban sa 2-0 Worthy/University of the Visayas (UV) Green Lancers.

Ubos sa pagpangu ni back-to-back CESAFI MVP Mark Jayven Tallo, Giovannie Luz ug Bernie Bregondo, ang Cobras nanghinaut nga magpabilin nila ang ilang kainit  sa ilang pakigsangka batok

sa Panthers sa pasiunang duwa nga gikatakda sa alas 5:15 sa hapon.

Samtang ang Webmasters malaumon nga   makakuha  na   sab og maayong  duwa gikan nilang   Garciano    Puerto, John   Jabello   ug   Clint Suelto sa ilang paghamag sa My Led Opto/Cebu Institute of Technology-University (CIT-U) Wildcats sa main game sa alas 7:00 sa gabii.

Bisan og sila maoy paborito,  ang  SWU ug UC gikinahanglan nga magmatngon gumikan kay    ang   ilang mga kaatbang   parehong gutom og daog human mahisukamod  sa   duha ka sunod-sunod nga higayon. (BANAT PALARO)