Tillor misutoy sa Borneo Marathon

CEBU, Philippines - Gipakita ni Cebuano long distance veteran Noel Tillor ang iyang ka maayong laki human siya mikampiyon sa Borneo International Marathon didto sa Suria, Sabah, Malaysia.

Si Tillor maoy nahimong labing unang Pinoy nga midaog sa men’s title sa maong marathon. Kini ang ikaduhang pagsalmot ni Tillor sa lumba human siya mapakyas pag-angkon sa titulo niadtong tuig 2014.

Ang two-time Milo Marathon Cebu leg champion mitapos sa makutas nga 42K marathon sud sa duha ka oras ug 48 minutos.

Gipanglupig ni Tillor ang mga runner dili lang gikan sa Malaysia, apan lakip na ang mga bisita gikan sa China, South Korea ug Indonesia diin ang uban mga kanhi sakop sa national teams.

Si Tillor miingon usab nga dili sayun ang lumba tungod sa rota niini nga naglakip sa mga tungason nga dalan, apan nabuhat niya nga madominaran kini tungod usab sa ensaktong preparasyon. (BANAT NEWS)