‘Do-or-die’ o ‘Goodbye’?
CEBU, Philippines - Gusto sa Rain or Shine Elasto Painters nga tapuson na nila ang semifinal series ug moabante sa finals, apan ang San Miguel Beermen andam sab nga mobabag aron mahatod ang duwa ngadto sa deciding Game-5.
Ang duha ka karibal mag-abot pag-usab karong alas-5 sa hapon sa Game-4 didto sa Smart Araneta Coliseum.
Pakyas ang Painters pagharos sa Beermen human sa ilang kapildihan sa Game-3, apan hugot gihapon ang ilang pagtuo nga anaa kanila ang momentum ug molampos pag-abante sa finals.
Ganado karon ang Beermen tungod kay anaa na ang ilang import nga si AZ Reid nga motabang kanila hulip sa gipapauli nga si Tyler Wilkerson. Si Reid kanhi import sa Rain or Shine. Hinuon ang mas mubo nga si Reid makig-atbang sa higante sa Painters nga si Pierre Henderson-Niles, kinsa maoy numero unong defensive player sa koponan.
Gawas sa mga import, magbangga sab ang mga local stars sa matag koponan diin iparada sa Beermen ilang MVP nga si JuneMar Fajardo uban sa mga gunners nga sila si Marcio Lassiter, Chriss Ross ug Alex Cabagnot.
Sa ilang bahin, ipakita sa Painters nga mas hait ang opensa sa ilang mga lokal nga bidahan nila ni Jeff Chan, Jericho Cruz, Paul Lee ug Best Player of the Conference candidate JR Quinahan. (BANAT NEWS)
- Latest