Anthony maoy napiling best player of the week
CEBU, Philippines – Gumikan sa eksplosibo niyang duwa atol sa ilang sangka batok sa Talk ‘N Txt niadtong Biyernes, ang forward sa NLEX nga si Sean Anthony maoy gipasidunggan nga PBA ‘Player of the Week’.
Si Anthony mitali og career-high nga 32 puntos uban ang 12 ka rebounds, duha ka assists ug usa ka steal nga daku kaayo og naambag sa Road Warriors aron makabangon gikan sa 17 puntos nga alkansi dayon na ngadto sa pagpakurat sa ilang sister-team.
Ang 29-anyos nga si Anthony, ang No.6 overall pick sa Air21 atol sa 2010 PBA Rookie Draft, mipukan sa duha ka Sugbuanong higante nga sila si Greg Slaughter sa Barangay Ginebra ug JuneMar Fajardo sa San Miguel Beer aron sakmiton ang maong dungog.
Alang ni NLEX coach Boyet Fernandez, mura sila og naka-jackpot sa dihang ilang nakuha ang 6-foot-4 nga si Anthony pinaagi sa trade niadtong off-season.
“We really wanted to get Anthony because we really don’t have a four-man who's agile so it's a jackpot,” matud pa ni Fernandez, kansang NLEX nakigsawo na karon sa ikaupat hangtod sa ikaunom nga puwesto uban sa Talk 'N Txt ug GlobalPort bitbit ang managsamang baraha nga 3-2 win-loss records.
Sa ikaunom niyang season, dili malimod ang kalamboan sa abilidad ni Anthony sa pag-average niya og 20.8 puntos, 13.6 rebounds ug 4.2 assists matag duwa. (BANAT NEWS)
- Latest
