Opisyal na nietes modepensa batok Alejo

CEBU, Philippines - Kompirmado na.

Si two-division world champion Donnie ‘Ahas’ Nietes (36-1-4, 21KOs) sa ALA Boxing Gym gikatakda nga manalipod sa iyang WBO light flyweight title batok sa Mehikanong kampiyon nga si Juan ‘Pinky’ Alejo (21-3, 13KOs) sa main event sa labing unang Pinoy Pride boxing card sa Amerika nga gikatakda karong Oktubre 17 didto sa StubHub Center sa Carson City, California.

“We wanted someone from the top 10 and he’s rated No.8. Alejo has not lost since December 2009 so it should be an interesting fight,” matud pa ni ALA Promotions President ug CEO Michael Aldeguer.

Human gipalukapa ni Jesus Limones niadtong Disyembre 12, 2009, si Alejo mikulit og impresibo kaayong 21 ka sunod-sunod nga daog. Iyang gibira ang korona isip Mexican light flyweight champion human gipaundang si Jose Guadalupe Martinez sa ika-11 nga hugna niadtong Agosto 20, 2014. Sa katapusan niyang away,  midaog siya pinaagi sa ‘split decision’ batok ni Jose Rivas tulo na ka bulan ang milabay.

Angayan hisgutan nga si Alejo midaog duha ka higayon batok ni Erik Ramirez pinaagi sa second round TKO niadtong tuig 2013. Si Ramirez mao ang boksidor nga mihagit ni Nietes, nga niadtong higayona mao pa ang WBO minimumweight champion, apan napilde pinaagi sa ‘unanimous decision’ didto sa iyang tugkaran sa Oaxaca, Mexico niadtong Pebrero 28, 2009.

Seguradong kulbahinam gyud ang maong sangka gumikan kay ang 32-anyos nga si Nietes wala pa man sab makatilaw og pilde sa milabay’ng 11 ka tuig. Pabilin siyang nagmangtas human gilangkat ang WBO minimumweight title pinaagi sa pagbuntog ni Thai Pornsawan Porpramook niadtong Septiyembre 30, 2007 dinhi sa Waterfront Cebu City Hotel and Casino nga maoy naghimo kaniya isip  “longest reigning Filipino world boxing champion”.

Gawas ni Nietes, ang managsuong ‘Prince’ Albert ug Jason ‘El Nino’ Pagara ug ingon man ang sumosulbong nga bitoon sa ALA Stable nga si Mark ‘Magnifico’ Magsayo mopakita sab sa ilang abilidad sa maong makasaysayanong fightcard sa ALA Promotions ug ABS-CBN didto sa Amerika nga giulohan og “Pinoy Pride 33: Filipinos Contra Latinos”.

Gikatakda silang   molarga sa Amerika sa ikaduhang semana sa Septiyembre aron padayonon ang ilang pagbansay-bansay didto sa Wild Card Gym ni Freddie Roach sa Los Angeles. (BANAT PALARO)