Power Forty gipakgang sa NIBA sa Saint Augustine Cup 2015
CEBU, Philippines – Naabtan sa kaluya ug kusog ang Power Forty sa hinapos nga bahin sa final period hinungdan nga nabugto ang nagkadina nilang daog sa Inayawan Inter-ballclub division sa Saint Augustine Cup 2015 basketball tournament niadtong Lunes sa gabii didto sa Inayawan Sports Complex.
Ang Power Forty napilde ngadto sa mas ubos pa nila og edad nga NIBA sa iskor nga 97-100.
Laraw sa Power Forty nga mobangon human sa maong kapildihan sa dihang ilang sangkaon ang FASIBA karong alas-7:30 sa gabii.
Si Kent Bono maoy nangu sa NIBA pinaagi sa iyang 26 puntos. Siya sab ang mipatilaw sa koponan sa labing unang labaw, 83-82 pinaagi sa technical free throw batok ni Ricboy Nacario sa kapin usa ka minuto ang nahabilin sa final period ug wala na makabangon pa ang Power Forty sukad niadto.
Miamot sab og 17 puntos si Akit Abella, samtang si Ay-ay Daculan mitampo’g 16 puntos alang sa NIBA nga maoy pirmeng naggukod. Sila si Cocoy Aquino ug Etor Bacalso miabuno’g 11 puntos matag usa.
Ang Power Forty nilang coach Michael Arias, Edwin Dejacto Sr. ug Dome Ozon gipangulohan sab ni Robert Abasolo, kinsa mipatuasik og 29 puntos.
Nakatabla unta ang Power Forty, 92-all sa daginutong oras sa duwa, apan naluya na kini.
Si Rey Abarquez mitikdol og 20 puntos, samtang si Nacario adunay 14 puntos alang sa Power Forty nga gipaluyohan nilang Atty. Flor Yosores, Lando Almojallas, Romy Rama, Vez Eleguin, Chino Kalinga ug Bob Samson.
Mao kini ang unang pilde sa Power Forty sud sa tulo ka duwa.
Wala hinuon makaduwa ang usa nila ka alas nga si Julian Capala tungod sa nahiagum nga injury.
Ang mga duwa gidumala ni league commissioner ug Inayawan barangay councilor Insik Tibay ug sa technical committee nga si Keneth Montaña
Puntos Matag Usa
NIBA (100) – Bono 26, Abella 17, Daculan 16, Aquino 11, Bacalso 11, Infante 9, Nacua 6, Tamarra 2, Jaca 2.
POWER FORTY (97) – Abasolo 29, Abarquez 20, Nacario 14,Dequit 8, Navares 6, Sumargo 5, Cabrera 5, Mercado 2, Tantiado 2, Misa 2, Buhay 4. (BANAT NEWS)
- Latest
