Di buot maparehas ni Donaire
Naleksyon na siguro si Manny ‘Pacman’ Pacquiao sa gidangatan niya sa mga kamot ni Juan Manuel ‘Dinamita’ Marquez pagpakatulog kaniya sa ikaunom nga round sa ilang ikaupat nga panagsangka duha ka tuig na ang milabay.
Nakabawi na siya pinaagi sa duha ka kadaugan diin iyang gi-outpoint sila si Brandon Rios ug gibawia’g bakus si Tim Bradley. Ang katapusang higayon nga naka-knockout si Pacquiao mao si Miguel Cotto niadtong 2009.
Kadto untang sangka nila ni Marquez, kinsa padung na og katumba maoy magpahinumdom unta sa boxing world nga duna pay bangis ang iyang kumo, apan nabali ang tanan tungod sa grabeng kompiyansa.
Exciting tan-awon ang mga away ni Pacquiao , apan kuwang sa panan-aw sa iyang fans kun di mahuman sa knockout.
Sa umaabot nga away nila ni Cris Algieri, si Pacquiao miingon nga di na siya mangambisyon pa’g KO. Sakto kini.
Siguro, nakita niya ang iyang kaugalingon kang Nonito Donaire nga bag-ohay lang na-KO sa ikaunom gihapon nga round batok sa mas taas ug mas daku nga si Nicholas Walters alang sa ilang featherweight fight sa miaging semana.
* * *
Ari ‘ta sa sitwasyon ni Donaire, tinuod dunay knocking power ang gibansagang The Filipino Flash, ebidensya niini ang 36-33, 21KO win-loss record.
Apan mas daku unta ang iyang bentaha sa eksperyensiya ug sa akong gihulagway nga “intelligent fighting” – style ni Donaire.
Way kuwestyon iyang power, nagtuo ko nga natarog si Walters sa second round, apan wala kadto magpasabot nga di na mangita og paagi sa Walters aron modaog.
Na-careless gyud si Donaire atubangan sa mas kusog ug paspas usab nga si Walters. Anha unta mosud ang iyang eksperyensiya ug ang inutok nga game plan.
Gani mismo iyang amahan miingon nga wala mosunod si Donaire sa ilang game plan, bisan siya mismo (Donaire) nga wala niya buhata ang ilang game plan.
Apan kinsa man ta nga mo-blame niya, dili man kita maoy gibukbok sa Jamaican nga gitawag og “Axe Man.”
* * *
PAGTULON-AN: “From one thing, know ten thousand things” ? -- Shimen Miyamoto Musashi
- Latest
