Third sakmiton sa UV

CEBU, Philippines - Seguradong dili na usikan sa University of the Visayas (UV)  Green Lancers ang panahon sa pagsakmit sa ikatulong puwesto dihang ilang ikabagat pag-usab ang University of San Jose- Recoletos (USJ-R) Jaguars karong gabii sa Game 2 sa “best-of-three” series sa 14th  Cebu Schools Athletic Foundation, Inc. (CESAFI) men's basketball tournament didto sa Cebu Coliseum.

Sayo karong hapon,  ang UV Baby Lancers  makigsangka batok sa University of Southern Philippines Foundation (USPF) Baby Panthers sa alas-5:15 sa hapon.

Karong gabhiona buot nang tiwason sa UV Lancers ang ilang tahas sa pag-angkon sa ikatulong pwesto nga dili na molanat pa ngadto sa “rubbermatch.”

Sa Game-1 niadtong Martes,  gipakita sa  UV Lancers nga dili lang kay si John Michael Abad,  Rhaffy Octobre o si Chris Perolino mao lang ang mahimong makadala ug makahatag og kadaugan sa Lancers tungod kay ang topscorers sa maong duwa mao ang ilang second stringer nga si Jerome Napao, kinsa mibahog og 20 puntos.

  Ang Lancers niduwa nga wala na silang Francisco Arong ug import Jeff Aguara, kinsa gisuspenso sa ilang team sa nahabiling mga duwa sa season tungod kay diriyot silang mag-away dihang napilde sila sa  University of San Carlos (USC) Warriors. (BANAT NEWS)