Daog nga way bili

CEBU, Philippines – Midaog ang Smart Gilas Pilipinas apan naghuyhuy gihapon ilang abaga tungod kay naglabaw lang sila og dos puntos batok sa Kazakhstan, 67-65, alang unta sa krusyal nga duwa diin may kahigayunan sila nga mulusut pa sa semifinals sa 2014 Asian Games didto sa Incheon, South Korea.

Ang Gilas kinahanglan unta nga mudaog nga naglabaw og 11 puntos batok sa Kazakhstan aron mahayagan pa ang ilang paglaum nga musud sa semis, apan gihatagan nila og kahigayunan ang mga Kazakhs aron tapuson ang duwa nga dos puntos ra ang labaw sa mga Pinoy.

Sama sa mga suliran nila sa unang mga duwa sa quarterfinals, ang Gilas milabaw og onse, 67-56, sa katapusang 2:07, apan wa na usab nila makupti ang dakung labaw ug nahilis na usab kini sa ilang mga kamot. Ang maong panghitabo mao usab ang gidangatan sa national team atol sa unang krusyal nila nga duwa batok South Korea niadtong Sabado diin milabaw sila og dul-an 20 puntos apan naapsan ra gihapon sa katapusan.

Gisuwayan pa ni Gilas naturalized player Marcus Douthit nga itabla ang iskor dihang miitsa siya sa ring sa kontra, apan wala kini tugti sa referee nga mao untay muhatod sa duwa sa overtime diin may kahigayunan ang Gilas nga mutukod balik og dakung labaw.

Si Douthit kinsa gipaduwa na og balik ni coach Chot Reyes human sa kontrobersyal nila nga panagbangi nangulo sa mga Pinoy sa iyang 18 puntos ug 14 ka rebounds.

Ang Pilipinas subli na usab nga mutapos sa basketball event sa Asian Games nga wala'y medalya sud na sa ikatulong sunod-sunod nga higayun. (BANAT NEWS)